ნინო ბურჯანაძე - გრიგოლ ვაშაძეს არ დაავიწყდეს, რუსული პასპორტი ძალიან დიდხანს რომ ედო ჯიბეში
გრიგოლ ვაშაძეს არ დაავიწყდეს, რუსული პასპორტი ძალიან დიდხანს რომ ედო ჯიბეში, - ასე გამოეხმაურა „დემოკრატიული მოძრაობის“ ლიდერი ნინო ბურჯანაძე საგარეო საქმეთა ყოფილ მინისტრს გრიგოლ ვაშაძის განცხადებას.

„დემოკრატიული მოძრაობის“ მიერ გავრცელებულ ინფორმაციაში ნინო ბურჯანაძე აცხადებს, რომ „ნაციონალურ მოძრაობას“ მორალური უფლება არ აქვს აგვისტოს ომზე ისაუბროს.

„ეს ხელისუფლება რომ ძალიან ხუჭავს თვალს, რაც ჩვენს საზღვრებზე ხდება, ეს სრულიად ნათელი და აბსოლუტურად მიუღებელი გახლავთ. სამწუხაროდ, 5 წლის განმავლობაში, რაც „ქართული ოცნება“ ხელისუფლებაშია, ერთი ნაბიჯიც კი არ გადაუდგამს თავისი ქვეყნის საზღვრების დასაცავად. დარწმუნებული ვარ, ერთი შეხვედრა მაინც რომ ყოფილიყო რუსეთის უმაღლეს ხელისუფლებასთან საქართველოს ხელისუფლების მხრიდან, ე.წ. საზღვრების გადმოწევა ნამდვილად არ მოხდებოდა. რაც შეეხება ბატონი სერგეენკოს განცხადებასთან დაკავშირებით „ნაციონალური მოძრაობის“ რეაქციას, თუ ვინმეს არ აქვს არანაირი მორალური უფლება ამ თემაზე განცხადება გააკეთოს, არის ნამდვილად „ნაციონალური მოძრაობა.“ 2008 წლის აგვისტოს მოვლენებთან დაკავშირებით დღეს სააკაშვილი და ვაშაძე ციხეში უნდა იყვნენ და მათ გვერდით უნდა იჯდეს ბოკერიაც და კიდევ ბევრი სხვაც. ვაშაძეს არ დაავიწყდეს, რუსული პასპორტი ომის შემდეგაც ძალიან დიდხანს რომ ედო ჯიბეში“, - განაცხადა ნინო ბურჯანაძემ.

"ერთიანი ნაციონალურ მოძრაობის" ერთ-ერთი ლიდერი გრიგოლ ვაშაძე შრომის, ჯანმრთელობისა და სოციალური დაცვის მინისტრის დავით სერგეენკოს განცხადებას მცოცავ ოკუპაციასთან დაკავშირებით, უპასუხისმგებლოს უწოდებს. როგორც გრიგოლ ვაშაძემ დღეს გამართულ პრესკონფერენციაზე განაცხადა, ასეთი განცხადებები საქართველოს საერთაშორისო ასპარეზზე გამოუსწორებელ ზიანს აყენებს.

ჯანდაცვის მინისტრმა დავით სერგეენკომ გუშინ, მთავრობის სხდომის შემდეგ გამართულ პრესკონფერენციაზე განაცხადა, რომ არანაირი მცოცავი და ეტაპობრივი ოკუპაცია არ არის - ეს არის იმ ”საზღვრების” დადგენა, რომელსაც 2008 წელს მაშინდელმა მთავრობამ გაუკეთა ლეგიტიმაცია.

FaceBook Twitter Google