ნინო ბურჯანაძე: თუ ვინმე სააკაშვილთან გარიგებას დააპირებს, ჩემი პარტიის წევრი აღარ იქნება
რაც უფრო ცოტა დრო რჩება 2020 წლის საპარლამენტო არჩევნებამდე, მით უფრო აქტიურდება სხვადასხვა სახის თანამშრომლობა ოპოზიციურ პოლიტიკურ პარტიებს შორის. ზოგმა პარტიამ უკვე დაიწყო ბლოკების შექმნაზე ზრუნვაც.

ვისთან მართავს კონსულტაციებს, რა პასუხი აქვს სააკაშვილთან მისი გარიგების შესახებ ჭორზე, აქვს თუ არა აზრთა სხვადასხვაობა თანაპარტიელ გუბაზ სანიკიძესთან, რას ფიქრობს მისი ვაჟის პოლიტიკაში მოსვლაზე და ხომ არ შეუცვლია პოზიცია ნატოსთან და რუსეთთან ურთიერობის ხედვაზე? _ ამ და სხვა საინტერესო საკითხებზე „ახალ თაობასთან“ ინტერვიუში „დემოკრატიული მოძრაობის“ ლიდერი ნინო ბურჯანაძე საუბრობს.

- როგორია თქვენი პოლიტიკურ გეგმები და რა ტიპის მუშაობა მიმდინარეობს? უკვე დაწყებულია რიგ პარტიებს შორის თანამშრომლობა, ბლოკების შექმნა და ა. შ. მხარს უჭერდით ერთიანი ფრონტით ბრძოლას ივანიშვილის წინააღმდეგ.

- იცით, რაშია საქმე? მე არავის წინააღმდეგ ვიბრძვი. მე ივანიშვილის წინააღმდეგ კი არ ვიბრძვი, არამედ მე ვიბრძვი იმისთვის, რომ ქვეყანას გაუჩნდეს ნორმალური განვითარების შანსი. სამწუხაროდ აღმოჩნდა, რომ ივანიშვილი და მისი უმრავლესობა ხელისუფლებიდან უნდა წავიდეს. ეს სულაც არ არის სასიხარულო, მაგრამ ისე გაიხადა ”ქართულმა ოცნებამ” საქმე, რომ ქვეყნის ერთადერთი შანსი ნამდვილად არის ის, რომ ის ხელისუფლებას ჩამოშორდეს.

მთავარი ამოცანაა, რომ ხალხს მიეცეს ობიექტური არჩევანის გაკეთების შესაძლებლობა. პარლამენტი, რომელიც გადამწყვეტი გახდა ქვეყნისათვის, იყოს მართლა ადეკვატური და საღი აზრის გამომხატველი. უმნიშვნელოვანესია, რომ საარჩევნო გარემო შეიცვალოს. ჩატარდეს სამართლიანი და ობიექტური არჩევნები და ძალა, რომელიც მართავს დღეს საქართველოს, შეიცვალოს ერთი ან რამდენიმე ძალის მიერ. რამდენიმე ძალის მიერ შეიცვალოს და იყოს კოალიციური მოქმედებები.

- ვისთან აწარმოებთ პირადად თქვენ მოლაპარაკებებს?

- ამ წუთში არიან ცალკეული პოლიტიკური ლიდერები, რომლებთანაც საუბრის დისკომფორტი არ მაქვს, თუმცა ყველაფერში არ ემთხვევა ჩვენი მოსაზრებები. მათთან ვსაუბრობ სხვადასხვა ფორმატზე და ფართო თანამშრომლობის შესაძლებლობაზე. ოცეულის ფარგლებში ვსაუბრობთ და მოქმედებებსაც ვახორციელებთ იმ თემაზე, რასაც ჰქვია საარჩევნო გარემოს შეცვლა.

- ეს ფორმატი ცნობილია.

- დიახ. ეს ის ფორმატია, სადაც პოლიტიკური დისკომფორტები გვერდზეა გადაწეული. ეს არის ერთადერთი თემა, სადაც ყველა – სიმპატიით, ანტიპატიით, პოლიტიკური შეხედულებების მიუხედავად ვიყოთ ერთი მაგიდის ირგვლივ. ეს მნიშვნელოვანი თემაა საარჩევნო თვალსაზრისით.

რაც შეეხება უფრო ფართო კოალიციას, ამაზე რამდენიმე პოლიტიკურ ორგანიზაციასთან მაქვს საუბარი.

- ვისთან ერთად განიხილავთ ბლოკსა თუ კოალიციას?

- ბლოკამდე ჯერ ძალიან ადრეა. იმიტომ, რომ არჩევნებამდე წელიწადნახევრით ადრე ბლოკებზე საუბარი ნამდვილად არასერიოზული და არასწორია. ამიტომ, ამ ეტაპზე დეტალებზე ვერ ვისაუბრებ.

- მაშინ, ის მაინც მითხარით, ვისთან გამორიცხავთ ამ თემებზე საუბარს?

- ნაციონალურ მოძრაობასთან და ბოკერიას პარტიასთან ბლოკში რომ არ ვიქნებით, მე მგონი, გასაგებია.

- იდეოლოგიურ თანხვედრას ეძებთ, ვისთან ერთადაც შესაძლოა გაერთიანდეთ?

- არა მარტო იდეოლოგიაზეა საუბარი. ჩემთვის მიუღებელია ნაციონალურ მოძრაობასთან თანამშრომლობა და ეს თქვენ ძალიან კარგად იცით. საუბარი მაქვს ორივე ფრთაზე. მით უმეტეს სამომავლოდ მათთან რაიმე ბლოკზე საუბარი ზედმეტია.

- ასეთი ინფორმაცია თუ ჭორიც არსებობს, რომ ბურჯანაძე სააკაშვილს გაურიგდა. რა პასუხი გაქვთ?

- არ მაინტერესებს. მაგ ტიპის ამორალურ და სულელურ, ”ქართული ოცნების” შემოგდებულ ჭორზე ნამდვილად არ ვაპირებ კომენტარის გაკეთებას. მე არ ვაპირებ იმ ადამიანების გადარწმუნებას, ვინც შეიძლება მსგავსი სისულელე ერთი წამითაც კი დაიჯეროს. თუმცა, არა მგონია, ასეთი ადამიანები არსებობდნენ. ეს არის პოლიტიკური კონიუნქტურა, რომლის დამკვიდრებასაც ცდილობს ივანიშვილი. ანუ ვინც ჩემთან არ არის, სააკაშვილთან არის თურმე. თუ ვინმე ამას დაიჯერებს, იმ ადამიანებთან ლაპარაკს ნამდვილად არ ვაპირებ.

- ეს გარკვეულწილად წარმოშვა თქვენი პარტიის ერთ-ერთი ლიდერის, გუბაზ სანიკიძის განცხადებებმა. მისი შეფასებები, რომ სააკაშვილი იზრდება, სწორ გზავნილებს აჟღერებს და ა. შ. თქვენთან თანხვედრაშია?

- ყველა სიტყვა შეიძლება თანხვედრაში არ იყოს და აბსოლუტურად ყველა ნაწილში არ ემთხვეოდეს ჩვენი მოსაზრება, მაგრამ გუბაზ სანიკიძეს არსად არ უთქვამს, რომ ჩვენ ვაპირებთ სააკაშვილთან თანამშრომლობას. სანიკიძემ თქვა, რომ სააკაშვილი არის ფაქტორი პოლიტიკაში. სამწუხაროდ, სააკაშვილი პოლიტიკაში ფაქტორია. ის, რომ ჩვენ არ გვინდა, რომ ეს ასე იყოს, ეს არ ნიშნავს, რომ ობიექტური რეალობა სხვანაირია. სააკაშვილი დღეს რომ ფაქტორია, ეს არის ბიძინა ივანიშვილის დამსახურება და არა ნინო ბურჯანაძის.

მე და ჩემი პოლიტიკური გუნდი რომ მოვსულიყავით ხელისუფლებაში არც სააკაშვილი იქნებოდა ფაქტორი და არც ნაციონალური მოძრაობა. ივანიშვილის თამაშმა და კოჰაბიტაციამ განაპირობა ეს შედეგი. 2012 წელს ნაციონალურ მოძრაობას მხარს უჭერდა 300.000 ადამიანი, ახლა კი 800.000 უჭერს.

- სანიკიძის შესახებ იმიტომაც გკითხეთ, რომ ასეთი აზრიც გაჩნდა, ხომ არ არის აზრთა სხვადასხვაობა ბურჯანაძის პარტიაში. რა პასუხი გაქვთ?

- ჩემს პარტიაში თუ ვინმე დააპირებს სააკაშვილთან რაიმე ტიპის გარიგებას, ამას გამოვრიცხავ, მაგრამ თეორიულად რომ წარმოვიდგინოთ, რომ ჩემს პარტიაში ვინმე დააპირებს სააკაშვილთან ღია ან ფარულ გარიგებას, ის მეორე წუთში ჩემი პარტიის წევრი აღარ იქნება. ეს აბსოლუტურად გამორიცხულია.

ასეთი ჭორიც გაავრცელეს, რომ გუბაზ სანიკიძე მიხეილ სააკაშვილს შეხვდა. გუბაზ სანიკიძე წელიწადნახევარია საქართველოდან ფიზიკურად არ გასულა, საზღვარი არ გადაუკვეთავს. მე ძალიან კარგად ვიცი, საიდანაც მოდის ეს ბინძური ჭორები. რა თქმა უნდა, ჩვენ ამას ადეკვატურ შეფასებას მივცემთ.

- სანიკიძემ რუსეთთან ურთიერთობაზეც გააკეთა განცხადება.

- სანიკიძეზე ნუ მაკეთებინებთ კომენტარს.

- განმარტებებს კი არ გთხოვთ, თქვენი აზრიც მაინტერესებს. მან თქვა, ხმები მისდის, რომ ივანიშვილი გეგმავს საქართველო ჩააბაროს პუტინს. თქვენც ხომ არ გაქვთ რაიმე ინფორმაცია ან თქვენც ხომ არ მოგსვლიათ ასეთი ხმები?

- ბატონი გუბაზის ინტერვიუზე თვითონ ბატონი გუბაზი გაგცემთ პასუხს. ის საკმაოდ გამოცდილი პოლიტიკოსია, რომ თავისი ახსნა-განმარტებები გააკეთოს.

რაც შეეხება ივანიშვილის პოლიტიკის შეფასებას, ჩემი და ჩემი პარტიის წევრების შეფასებები ერთმანეთს ემთხვევა. ზოგმა შეიძლება უფრო მკვეთრად გამოთქვას ეს მოსაზრებები, ზოგმა ნაკლებად. ჩვენ ვხედავთ, რომ არცერთი ნაბიჯი არ იდგმება იმისთვის, რომ საქართველოს პრობლემები მოგვარდეს. ამ დროს ვიძახით, რომ რუსეთთან ურთიერთობები დალაგებულია. როდესაც საზღვარი გადმოდის ლამის ყოველდღიურად, ყოველ შემთხვევაში სისტემატიურად და ამ დროს ივანიშვილი აცხადებს, რომ სტრატეგიული მოთმინება უნდა შევინარჩუნოთ და ხმა არ ამოვიღოთ, ეს რას ნიშნავს?! ვინმემ მისი ეზო რომ გადასწიოს და მის ეზოში ვინმემ სახლი ააშენოს, ხმას არ ამოიღებს?!

- ცოტა ხნის წინ იყავით მოსკოვში. უკვე მეორედ დაემთხვა რუსეთში თქვენს ვიზიტს, როდესაც საოკუპაციო რეჟიმის წარმომადგენლებმა რაღაც ინციდენტები მოაწყვეს ჩვენს კონტროლირებად ტერიტორიაზე.

- არა, არაფერი არ დამთხვევია. ამჯერად ნამდვილად არაფერი მომხდარა ხურვალეთში. ეს იყო აბსოლუტური პროვოკაცია. როგორც კი გავიგე ეს ინფორმაცია, მზად ვიყავი, რომ ეს საკითხი დამეყენებინა ჩემს რუს კოლეგებთან. ვეცადე ინფორმაციის გადამოწმება და აღმოჩნდა, რომ ეს იყო აბსოლუტური პროვოკაცია. სანამ ამ პროვოკაციებს თავს არ დავანებებთ სერიოზული საფრთხეების წინაშე ვიქნებით.

- არაფერი მომხდარა?

- არაფერი მომხდარა.

- რა ფოტოებიც ვნახეთ, რომ გადმოსულები იყვნენ ჩვენს კონტროლირებად ტერიტორიაზე, ეს არაფერს არ ნიშნავს?

- არსად არავინ არ გადმოსულა. ჩვენ ტერიტორიაზე დიდი ხანია გადმოსულები არიან.

ამას სჭირდება ძალიან სერიოზული მუშაობა. დიახ, ამას სჭირდება ეფექტური კონსულტაციები და კომუნიკაცია რუსეთთან. მნიშვნელოვანი იყო ხელისუფლებას ემოქმედა, თუმცა მან ვერც ერთხელ გაბედა, რომ ღია დიალოგი დაეწყო ქვეყნისათვის ყველაზე მნიშვნელოვან და მტკივნეულ საკითხებზე.

- დაინახეთ პოლიტიკური ნება რუსეთის მხრიდან, რომ თანამშრომლობისთვის მზად არიან?

- მე ამას სულ ვადასტურებ. ეს პოლიტიკური ნება არსებობს, მაგრამ ამ პოლიტიკური ნების სარეალიზაციოდ და განსახორციელებლად საჭიროა, რომ ქართული მხარე საკუთარ ინტერესებზე ზრუნავდეს და არა სხვა ქვეყნების ინტერესებზე.

- ვის ინტერესებზე ზრუნავს ქართული მხარე?

- ყველა ქვეყნის _ დასავლეთის, ამერიკის, სხვა სახელმწიფოების, მაგრამ საკუთარ ინტერესზე რომ არ ფიქრობს, ეს აბსოლუტურად ნათელია და ეს ჩანს შეუიარაღებელი თვალითაც.

- მოსკოვში ვიზიტისას კიდევ ერთხელ გაახმოვანეთ ნატოზე გზავნილი, რომ არ უნდა გავწევრიანდეთ. ამას მოჰყვა არა მხოლოდ ოპონენტებისგან თქვენი კრიტიკა, არამედ მათგანაც, ვისთანაც გარკვეულ საკითხებზე თანამშრომლობთ.

- მაგალითად?

- მაგალითად, უსუფაშვილის მხრიდან.

- გასაგებია. ამ საკითხში ჩემი და ბატონი დავითის პოზიცია რადიკალურად განსხვავდება ერთმანეთისგან. თუმცა, ეს ჩვენ არ გვიშლის ხელს, აქტიურად ვითანამშრომლოთ ქვეყნის შიდა საკითხებთან დაკავშირებით. იმიტომ, რომ საშინაო საკითხებთან დაკავშირებით, ძალიან ბევრ საკითხში ჩვენი პოზიციები ემთხვევა. ბატონ დავითს ნატოსთან დაკავშირებით თავისი ხედვა აქვს, მე _ ჩემი ხედვა. დრო გამოაჩენს, რომელია სწორი.

- თუ ხელისუფლებაში მოხვალთ, რეალურად დაიწყებთ ამ თემაზე მუშაობას, რომ ნატოზე უარი თქვათ?

- რას ნიშნავს ნატოზე ვიტყვით უარს, ნატოში გვიღებენ?!

- ჩვენი პოზიციის ოფიციალურად გაჟღერებას ვგულისხმობ.

- დღევანდელ სიტუაციაში მიმაჩნია, რომ საქართველოს ნატოში გაწევრიანება არარეალისტურია. რეალისტურიც რომ იყოს, იმ პირობებში, როდესაც რუსეთის ჯარები დგას აფხაზეთსა და სამაჩაბლოში, ეს ჩვენთვის მავნეა. ჩვენ უნდა ვთქვათ _ დიახ, ძალიან აქტიურად ვითანამშრომლებთ ევროკავშირთან, დიახ ძალიან აქტიურად ვითანამშრომლებთ იგივე ნატოსთანაც ჰუმანიტარულ საკითხებში, მაგრამ ნატოს ჯარები საქართველოში არ განლაგდება.

- აქტიურ პოლიტიკაში ჩაერთო თქვენი ვაჟი ანზორ ბიწაძე. პარასკევს გაახმოვანა ეს ინფორმაცია. როგორია თქვენი დამოკიდებულება ამ საკითხზე?

- ის პრინციპში ყოველთვის აქტიურად იყო ჩართული ჩვენს საქმიანობაში. ძალიან აქტიური იყო. დაწყებული 2003 წლიდან. პარტიაში ყველა საფეხური გაიარა, რიგითი წევრიდან დაწყებული. აქტიურად მუშაობდა ახალგაზრდებთან, აქტიური მონაწილე იყო ჩვენი ყველა მოქმედებების. პრინციპში ჩართული იყო ამ მუშაობაში თავიდან ბოლომდე. თუმცა, თვლიდა, რომ ღია პოლიტიკაში გასასვლელად მას კიდევ სჭირდებოდა გარკვეული გამოცდილება და მომზადება. ახლა თავად ჩათვალა, რომ უკვე შეუძლია, როგორც პარტიის ახალგაზრდა სახეს, გამოვიდეს თავისი სიტყვებით და თავისი დამოკიდებულებით.

მე ამას მხარი დავუჭირე. ვთვლიდი, რომ ადრეც შეეძლო ამის გაკეთება, თუმცა თვითონ ეკიდება საკუთარ თავს კრიტიკულად და პასუხისმგებლობით. იმასაც ხვდება, რომ, ვინაიდან ჩემი შვილია, შესაძლოა, მის მიმართ მეტი მოთხოვნა იყოს საზოგადოების მხრიდან, მეტი კრიტიკა და მოლოდინი.

ვფიქრობ, რომ საინტერესო ინტერვიუ იყო ტელეეთერში. მე ალბათ ბოლომდე ობიექტური ვერ ვიქნები, მაგრამ მგონია, რომ კარგი სტარტი იყო. ახლა ბევრი რამე მასზეა დამოკიდებული, როგორ გააგრძელებს აქტიურ პოლიტიკურ საქმიანობას.
FaceBook Twitter Google